Guverineri w’Intara y’Iburasirazuba Madame KAZAIRE Judith ari kumwe n’Abayobozi b’Ingabo na Polisi mu Ntara baje kwifatanya n’Akarere ka Ngoma, mu muhango wo gusoza icyunamo wabereye ku Rwibutso rwa Jenoside rwa ZAZA.

Mu gusoza icyumweru cyo kwibuka Jenoside yakorewe abatutsi kuri iyi nshuro ya 23,  kuri uyu wa kane tariki ya 13/04/2017, Ubuyobozi bw’Intara bwaje kwifatanya n’Akarere ka Ngoma. Uyu muhango wa bereye ku rwibutso rwa Jenoside rwa Zaza, mu murenge wa Zaza ahashyinguwe kuri uyu munsi imibiri y’abana 35; iyi mibiri hafi ya yose ikaba yaravumbuwe mu isambu ya ADEPR iri mu murenge wa Mugesera, Akagari ka Ntaga.

Guverineri w’Intara, Madame KAZAIRE Judith akaba yari kumwe n’Umuyobozi w’Ingabo mu Ntara y’Iburasirazuba n’Igice cy’Umujyi wa Kigali Major General Mubarakh MUGANGA, Umuyobozi wa Polisi mu Ntara y’Iburazirazuba CSP Johnson SESONGA, Umuyobozi wa Reserve  Force mu Ntara Brigadier General Augustin GASHAIJA; bose hamwe n’abandi b ashyitzi banyuranye, hamwe n’abaturage, bakaba bari baje gusubiza icyubahiro no kunamira abazize Jenoside yakorewe Abatutsi mu 1994.

Mu gutanga ikaze Umuyobozi w’Akarere ka Ngoma, Bwana NAMBAJE Aphrodise yibukije ko ako gace ka Zaza kayogojwe n’Abayobozi babi bo muri Leta zahise; yakomeje kandi ahumuriza ababuze ababo, abawira ko Igihugu nk’Umuryango mugari w’Abanyarwanda gihari kandi kizakomeza gukora ibishoboka ngo bagire agaciro. Yarabahumurije, ashimangira ko Leta nziza iyobowe na Nyakubahwa Perezida wa Repubulika Paul KAGAME, izakomeza gukora ibyiza byo kubashyigikira.
Abatangabuhamya bavuze bose bagarutse ku ngingo y’uko gushyingura ababo bazize Jenoside bibaha kuruhuka mu mutima, bityo bakomeza gusaba ababa bazi aho abazize Jenoside bataraboneka ngo bashyingurwe bari bahagaragaza. Bagaragaje ko kwibuka bibakomeza kuko bibibutsa ko bariho kandi bagomba kwihesha agaciro no gukomera ku bimaze kugerwaho nk’uko n’insangamatsiko y’uyu mwaka igira iti “Twibuke Jenoside yakorewe Abatutsi, turwanya ingengabitekerezo ya Jenoside, dushyigikira ibyiza twagezeho”, ibishimangira.

Mu ijambo rye, Guverineri KAZAIRE Judith, yakomeje kandi ahumuriza ababuze ababo muri Jenoside yakorewe abatutsi mu 1994, avuga ko imbaraga zahagaritse Jenoside zikubye inshuro nyinshi, ko rero abarokotse, kimwe n’abandi Banyarwanda bose bagomba kumenya ko Jenosdie idashobora kongera ukundi mu Rwanda. Mu gusoza ijambo yakomeje guhumuriza abafite ababo bashinguye mu Rwibutso rwa Jenoside rwa ZAZA, asaba Ubuyobozi bw’Akarere ka Ngoma kwita kuri urwo rwibutso, nk’uko byari byasabwe, bityo rugasakarwa. Yasabye abantu bose gukomeza kwibuka mu gihe cy’iminsi ijana nk’uko babisabwa, bagakomeza n'ibikorwa byiza byo kwita ku barokotse kandi bakirinda ibyabakomeretsa byose.

By SIBOMANA Jean Bosco
PRMCO/NGOMA