Kuri uyu wa gatandatu tariki ya 30/01/2016, Umuyobozi w’Akarere ka NGOMA w’agateganyo, Bwana KANAYOGE Alex yagiye kwifatanya n’abaturage bo  mu Murenge wa Mugesera mu bikorwa by’Umuganda usoza ukwezi kwa Mutarama 2016. Yari aherekejwe n’Umuyobozi wa Polisi mu Karere ka NGOMA DPC CIP Félix NDAYAMBAJE, Muganga Mukuru w’Ibitaro bya KIBUNGO, Dr NAMANYA William, n’Abakozi b’Akarere n’itsinda rinini ry’abakozi ba IPRC-East, ndetse n’abakozi ba  Banki ya ECOBANK, bari bayobowe n’Umuyobozi w’Ishami rya Kibungo Bwana MUKUNZI Jean Bosco. Nyuma y’ibikorwa by’umuganda byibanze mu gukuringira amazu y’abaturage batoranyijwe mu kagari ka NTAGA imidugudu y’Urukoki na Kabeza, aho mu Murenge wa Mugesera no gutema ibihuru hafi yayo mazu,  habaye ibiganiro bikurikira:

-        -  Ikiganiro ku kurwanya marariya no kwita ku isuku n’isukura cyatanzwe na Dr. NAMANYA William;

-   - Ibiganiro bibiri byatanzwe n’Umunyamabanga Nshingwabikorwa w’Umurenge wa Mugesera, Bwana BIZUMUREMYI Jean Damascène: Icyerekeranye n’amatora y’ibanze ateganyijwe mu minsi iri imbere n’ikiganiro ku kugaburira abana bo mu mashuri ya 12YBE.

-        -   Hatanzwe na none ikiganiro cyerekeranye n’umunsi mukuru w’Intwari z’u Rwanda, umunsi uzaba tariki ya 01/02/2016. Ikiganiro cyatanzwe n’Umukozi ushinzwe Itorero mu Karere ka Ngoma, Bwana NGARAMBE Sylvère, aho yakanguriye abaturage kuzawitabira, ariko bakazirikana ko buri wese ashobora kuba intwari, aramutse ashyize imbere ibikorwa byiza by’indashyikirwa, bifite inyungu rusange.

Muri ibyo biganiro bisoza umuganda, abaturage kandi bakanguriwe igikorwa cyo gutanga amaraso yo gufashisha abarwayi b’indembe bayakeneye, bibutswa ko gutanga amaraso ari ugutanga ubuzima, kandi ko amaraso akenerwa ku mpamvu zinyuranye, zishobora kuba kuri uri wese. Icyo gikorwa cyakozwe n’abakozi bo mu Kigo cya Leta cya RBC( Rwanda Biomedical Center). Abaturage beretswe  n’uburyo bwo gusukura amazi, hakoreshejwe imiti idahenze, aho amazi y’ibiziba ahinduka urubogobogo mu mwanya muto cyane; ubu bukangurambaga bukaba  bwarakozwe n’abakozi bo mu muryango SFH(Society for Family Health).

Mu ijambo rye umuyobozi w’agateganyo w’Akarere ka NGOMA, Bwana KANAYOGE Alex, yasabye abaturage kurwanya marariya bivuye inyuma kuko ari icyorezo gikomeye, uhereye ku mibare igaragazwa n’ibigo nderabuzima, abasaba no kugira isuku kugira ngo bagire ubuzima buzira umuze kuko ari byo Nyakubahwa Perezida wa Repubulika Paul KAGAME abifuriza, kandi bakaba bariyemeje kutamutenguha. Yabasabye kubumbatira umutekeno, kuko umutekano ari umusingi wa byose, kuko iyo udahari nta kintu na kimwe cyakorwa. Yabasabye by’umwihariko guca ukubiri n’ingeso yo kunywa kanyanga no kurebera abayinywa kuko urugomo n’ibyaha bikomoka ku kunywa icyo kiyobyabwenge ari byinshi kandi bishobora kugira ingaruka kuri buri wese.