Uyu munsi, Umuyobozi w’Akarere ka Ngoma, Madamu NIYONAGIRA Nathalie, ari kumwe n’abagize inzego z’umutekano n’abafatanyabikorwa batandukanye, bifatanyije n’abaturage b’Umurenge wa Rukira, Akagari ka Buliba, mu kwizihiza Umunsi Mpuzamahanga w’Umugore wo mu Cyaro wizihizwa buri mwaka ku wa 15 Ukwakira.

Insanganyamatsiko y’uyu mwaka igira iti: “Umugore ni uw’agaciro.”

Ibi birori byaranzwe no kumurika ibikorwa by’iterambere by’abagore bo hirya no hino mu Mirenge igize Akarere ka Ngoma, byiganjemo ibikorwa by’ubuhinzi n’ubworozi, ubukorikori, ubucuruzi n’indi mishinga y’iterambere yagaragaje uruhare rw’abagore mu guteza imbere imiryango yabo n’Akarere muri rusange.

Mu butumwa bwe, Umuyobozi w’Akarere Madamu NIYONAGIRA Nathalie yashimiye abagore b’Intangarugero biteje imbere bagafasha bagenzi babo gutera imbere, agaragaza ko ibyo bigaragaza uburyo abari n’abategarugori bakoresheje neza amahirwe Igihugu cyabahaye mu nzego zitandukanye.

Yagize ati: “Abagore bo mu cyaro ni inkingi ikomeye mu iterambere ry’Igihugu. Turabasaba gukomeza gukoresha neza amahirwe Leta yabahaye, gufatanya n’abandi mu bikorwa bizamura imibereho myiza n’iterambere ry’imiryango yabo ndetse n’Akarere muri rusange.”

Bamwe mu bagore bitabiriye ibi birori bashimiye ubuyobozi bw’Akarere ku bufatanye n’inzego zose mu guteza imbere umugore wo mu cyaro, bavuga ko bibongerera imbaraga zo gukomeza gukora no kwiteza imbere.

Umunsi Mpuzamahanga w’Umugore wo mu Cyaro wizihizwa hagamijwe gushimira uruhare rw’umugore mu buhinzi, mu kurwanya inzara, no mu guteza imbere imiryango n’ibihugu by’umwihariko hakazirikanwa uruhare rw’abatuye mu bice by’icyaro.