Kuri uyu wa Kabiri, Umuyobozi w’Akarere ka Ngoma, Niyonagira Nathalie, ari kumwe n’inzego z’umutekano, basuye Umudugudu wa Rwamenyo mu rwego rwo kureba uko abaturage baho bubahiriza gahunda za Leta no kwishimira intambwe umaze gutera mu bijyanye n’umutekano n’imibereho myiza.

Umudugudu wa Rwamenyo umaze amezi atandatu yose nta cyaha kivugwamo, ishema abaturage n’ubuyobozi bawugize bashyira ku ngamba nshya n’udushya twashyizwe mu bikorwa.

Mu bisobanuro byatanzwe n’Umukuru w’Umudugudu, Madamu MUKARUZIGA Angélique, yagaragaje ko intsinzi y’amezi atandatu y’ituze ishingiye ku bikorwa remezo by’umutekano n’imibereho myiza birimo:

• Icyumba ntangamukuru gikurikirana ibikorwa byose bikorerwa mu mudugudu,

• Irondo ry’abaturage rikora buri joro,

• Kwita ku burenganzira bw’abana harimo kurwanya inda ziterwa abangavu,

• Gukurikirana uburezi no kureba ko abana bose bajya ku ishuri,

• Igitabo cy’umudugudu cyandikwamo abinjira n’abasohoka.

Meya Niyonagira Nathalie yashimye cyane ubwitange bw’abaturage ba Rwamenyo n’ubuyobozi bwabo mu guharanira umutekano, yibutsa ko ibikorwa nk’ibi bigaragaza ko gushyira hamwe no guhanga udushya ari intwaro y’iterambere rirambye.  Yagize ati: “Rwamenyo ni urugero rutwereka ko dushobora kugira umudugudu utarangwamo icyaha igihe cyose abaturage n’ubuyobozi bafatanyije. Ibi bikorwa by’ubufatanye bikwiye gukomeza kandi bigere no mu yindi midugudu.” 

Madamu MUKARUZIGA Angélique we yijeje ko abaturage bazakomeza gukora ibishoboka byose kugira ngo umudugudu ayobora ube icyitegererezo mu karere no mu gihugu hose.

Yagize ati: “Twebwe abaturage b’Umudugudu wa Rwamenyo twiyemeje gukomeza kuba bandebero duhanga udushya ariko byose bikajyana no gushyira mu bikorwa gahunda za Leta kugira ngo uyu mudiugudu wacu ukomeze kuba umudugudu w’icyitegererezo mu mutekano no mu mibereho myiza,”.

Umudugudu wa Rwamenyo, uhereye mu Kagali ko Mugatare, mu Murenge wa Mugesera utuwe n’ingo 190, amasibo 9, abaturage 833, ukaba ku buso bwa 1.5Km² wahindutse urugero rwiza rwo kwerekana ko ubufatanye bw’abaturage n’inzego z’ubuyobozi bushobora kubyara umusaruro ugaragara no kwiyemeza icyo abaturage bashatse bakakigeraho bafatanyije.

Iyo ugeze mu biro by'umudugudy wa Rwamenyo itemberezwa icyumba ntangamakuru cy'umudugudu ukamenya neza ubuzima bw'abawutuye.

Umuyobozi w'Akarere NIYONAGIRA Nathalie ari kumwe n'abandi bayobozi basobanuriwe ibikubiye mu cyumba ntangamakuru cy'Umudugudu wa Rwamenyo.

Abaturage b'Umudugudu wa Rwamenyo baganiriye n'abayobozi biyemeza gukomeza guhanga udushya mu kurwanya ibyaha mu mudugudu wabo. 

Umuyobozi w'Akarere NIYONAGIRA Nathalie yashimiye abaturage b'umudugudu wa Rwamenyo uburyo bakomeje kwitwara neza mu kurwanya ibyaha.