Kuri uyu wa 8 Mata 2025 mu Murenge wa Sake habaye igikorwa cyo kwibuka ku nshuro ya 31 Jenoside yakorewe Abatutsi mu 1994, hibukwa by’umwihariko abatutsi bishwe baroshywe mu Kiyaga cya Mugesera.

Iki gikorwa cyitabiriwe n’abaturage, abayobozi mu nzego zitandukanye ndetse n’inshuti n’imiryango yabuze ababo muri Jenoside yakorewe abatutsi mu 1994. Ni igikorwa cyaranzwe n'urugendo rwo kwibuka, gushyira indabo mu kiyaga cya Mugesera.

Mu ijambo rye, Madamu Nathalie NIYONAGIRA, Umuyobozi w’Akarere ka Ngoma, yashimangiye ko kwibuka ari inshingano za buri Munyarwanda kandi ko ari umwanya wo gukomeza guha agaciro abishwe bazira uko baremwe.

Yagize ati: “Kwibuka abacu ni igihango dufitanye kuko bitwibutsa ububi n’ubugome Jenoside yakorewe Abatutsi yakoranywe bigatuma turushaho gufata ingamba ngo bitazongera ukundi. Tuboneyeho gushimira abarokotse bagize ubutwari bwo kubaho no gutanga imbabazi ku bakoze jenoside yakorewe abatutsi mu 1994 nubwo bitari byoreshye. Ubuyobozi bwacu buzakomeza kuba hafi y’abacitse ku icumu, kubatera inkunga mu rugendo rwo gukira ibikomere no kubaka ejo hazaza heza.”

Yakomeje asaba urubyiruko kwigira ku mateka mabi igihugu cyanyuzemo, bakarushaho kwirinda ivangura iryo ari ryo ryose ndetse no kuba umusemburo w’ubumwe n’ubwiyunge.

Abitabiriye igikorwa basobanuriwe amateka mabi yaranze ubwicanyi mu cyahoze ari Komini Sake nkuko byagarutswe n’uwatanze ubuhamya yarokokeye mu cyahoze ari komini Sake, banasabwe gukomeza kuba abafatanyabikorwa mu kurwanya ingengabitekerezo ya Jenoside.

Amwe mu mafoto yaranze ibikorwa byo kwibuka ku nshuro ya 31 jenoside yakorewe abatutsi mu 1994

Abaturage nabayobozi bashyize indabo ku rwibutso rwa jenoside rwa sake mu rwego rwo kunamira imibiri y'abatutsi bazize jenoside yakorewe abatutsi mu 1994 iharuhukiye.

Abayobozi n'abaturage bashyize indabo mu kiyaga cya Mugesera mu rwego rwo guha icyubahino no kunamira imibiri yabatutsi bakiguyemo mu gihe cya jenoside yakorewe abatutsi mu 1994.

Nyuma yo gushyira indabo mu kiyaga cya Mugesera abaturage n'abayobozi bahuriye ku ishuri rya Rukoma Sake mu gikorwa cyo kwibuka ku nshuro ya 31 jenoside yakorewe abatutsi mu 1994