Kuri uyu wa kane tariki ya 11/04/2019, mu Karere ka Ngoma habaye umuhango wo Kwibuka ku nshuro ya 25 abahoze ari Abakozi b'Amakomini yahujwe akaba Akarere ka Ngoma, bazize Jenoside yakorewe Abatutsi mu 1994. Uyu muhango witabiriwe na Depite NDAGIJIMANA Léonord, Komiseri mu Komisiyo y’Ubumwe n’Ubwiyunge Bwana BISHOKANINKINDI David, Umuyobozi w’Akarere bwana NAMBAJE Aphrodise, Visi Meya KIRENGA Providence, Abajyanama b’Akarere, Abayobozi b’Inzego z’Umutekano zinyuranye(RDF, RNP. RCS, NISS, RIB, DASSO), Abakozi b’Akarere baturutse ku Cyicaro cy’Akarere no mu Mirenge, ndetse n’abavandimwe n’inshuti z’abakozi bazize Jenoside bibukwaga. Muri rusange abakozi bazize Jenoside bamaze kumenyakana, bakoraga muri ayo makomini ya Birenga, Kigarama, Mugesera, Rukira na Sake ni 27, ariko amakuru akaba agikusanywa.
Uyu muhango wabimburiwe n'urugendo rwo kwibuka, kunamira abazize Jenoside baruhukiye mu Rwibutso rwa Kibungo no gushyira indabo ku mva.

Muri uru rugendo rwo kwibuka, hakaba hasuwe kimwe mu bimenyetso bya Jenoside. Ni ikamyo y'umwe mu bicanyi ruharwa, HABIMANA Emmanuel bita Cyasa yakoreshejwe muri Jenoside. Iyo kamyo niyo yatwaraga interahamwe zigabye ibitero byo kwica Aabtutsi, ikanakoreshwa mu kwikirorera Abatutsi bamaze kwicwa, n’abakirimo akuka, igiye kubarunda ahacukuwe urwobo rwo kubajugunyamo hafi y’Ibitaro bya Kibungo.
Mu ijambo rye, Umuyobozi w’Akarere Bwana NAMBAJE Aphrodise, yihanganishije ababuze ababo, twibuka none. Yibutsa ko kwibuka abari abakozi b'amakomini ari ngombwa, "kuko bidufasha kusa ikivi bagenzi bacu basize, tukanaboneraho gufata ingamba zo kunoza umurimo no kubana neza n'abo dukorana". Yashoje agira ati “Twibuke Twiyubaka”.
Mu mwanya wo kwibuka aba bakozi 27 b’amakomini, bavuga buri umwe, hatanzwe ubuhamya ku mico myiza, umurava, ubwitange n'urukundo  bagiraga. Iyo mico myiza ikaba igomba kutubera icyitegererezo, mu kusa ikivi basize.
Hon. NDAGIJIMANA Léonard yavuze ko twibuka Jenoside yakorewe Abatutsi, kugira ngo twunamire abacu bazize Jenoside, twamagane ibibi. Mu kwibuka, tuba dufata mu mugongo abarokotse Jenoside. Ni umwanya kandi wo kubwira abato amateka, ubuhamya nyabwo kugira ngo birinde ibihuha bipfobya Jenoside, ahubwo barwanye ingengabitekerezo ya jenoside

By SIBOMANA Jean Bosco
PRMCO/Ngoma