Imirimo yo kubaka umuhanda wa kaburimbo Ngoma–Ramiro ureshya n'ibilometero 52, irarimbanyije, aho biteganyijwe ko uzarangira kubakwa mu mwaka wa 2026, utwaye miliyari 64 Frw ukazahuza abaturage ba Ngoma na Bugesera mu bwigunge dore ko hari imirenge yafatwaga nk’icyaro igiye kunyuramo uyu muhanda wa kaburimbo uzaba ari nyabagendwa ku modoka nini zambukiranya imipaka zitwaye ibicuruzwa. Imirenge igiye kunyuramo kaburimbo ni Kibungo,Kazo,Gashanda, Sake na Rukumberi.

Uyu muhanda uhuza Akarere ka Ngoma na Bugesera witezweho kuzoroshya ubuhahirane kugeza umusaruro ku masoko n'imigenderanire hagati y'Uturere twombi.

Mu rwego rwo kwihutisha imirimo yo kubaka iyi mihanda hamaze kwishyurwa ingurane abaturage bafite ibyabo byangirijwe nikorwa ryawo kuburyo nta kizakoma mu nkokora kwihuta kw’imirimo.

Abaturage baturiye uyu muhanda bavuga ko ujye kubakura mu bwigunge kuko uzatuma bakora ibikorwa by’ubucuruzi no korosha imigenderanire..

NSENGIMANA Patrice atuye mu Murenge wa Gashanda yemeza ko uyu muhanda utarakorwa bitabaga byoroshye kubona imodoka igutwara mu Mujyi wa Kigali. Yagize ati: “Uyu muhanda ni igisubizo ku bibazo by’ubwikorezi by’abantu n’ibintu twajyaga duhura nabyo, hano twagiraga ikibazo cyo kugeza umusaruro ku isoko kubera imihanda yuzuye ibinogo bigatuma imodoka zitaza gupakira umusaruro wacu.”

NIBAGWIRE Speciose we yagaragaje uyu muhanda nk’ishoramari rijye rigana abaturage kuko bagiye gukora ubucuruzi ndetse bikazatuma n’amasantire y’ubucuruzi agenda yaguka. Yagize ati: “Hano dutuye mu cyaro ariko ubu turabona ko hagiye kuba umujyi kubera uyu muhanda, tuzajya ducuruza bidufashe kubona abaguzi kubera abagenzi benshi bagiye kujya bakoresha uyu muhanda.”

Uyu muhanda watangiye kubakwa mu 2021 ndetse kuri ubu igeze ku kigereranyo cya 60,6%. Biteganyijwe ko izarangira mumpera z'umwaka wa 2025, utwaye miliyari 64 Frw.

Umuhanda mushya uhuza Akarere ka Ngoma na Bugesera ugiye koroshya kubuhahirane hagati y'Uturere twombi.