Kuri uyu wa Gatandatu, tariki ya 29 Werurwe 2025, Umunyamabanga wa Leta muri Minisiteri y’Uburezi, Madamu IRERE Claudette, ari kumwe na Senateri UWIMBABAZI Penina ndetse n’Umunyabanga Nshingwabikorwa w’Intara y’Iburasirazuba, Dr. NYIRAHABIMANA Jeanne, bifatanyije n’Ubuyobozi bw’Akarere ka Ngoma n’abaturage mu muganda rusange usoza ukwezi kwa Werurwe 2025.

Uyu muganda wari ugamije gusukura Urwibutso rwa Jenoside rwa Kibungo mu rwego rwo kwitegura ibikorwa byo kwibuka ku nshuro ya 31 Jenoside yakorewe Abatutsi mu 1994.

Uyu muganda witabiriwe n’abayobozi mu nzego zitandukanye, barimo Meya w’Akarere ka Ngoma, Madamu Nathalie Niyonagira, inzego z’umutekano, urubyiruko ndetse n’abaturage b’ingeri zose. Abitabiriye uyu muganda bakoze isuku ku rwibutso, batunganya ubusitani bwarwo no gusiga irangi ku byuma by’uruzitiro rwo ku rwibutso.

Madamu IRERE Claudette yavuze ko gufata neza inzibutso ari inshingano ya buri Munyarwanda kugira ngo amateka atazasibangana. Yagize ati:
"Urwibutso rwa Jenoside rwa Kibungo ni ahantu h’icyubahiro twibukira inzirakarengane zazize Jenoside yakorewe abatutsi mu 1994. Kurwitaho no kurusukura ni ikimenyetso cyo kubaha agaciro bambuwe no kubaziriakana dukomeza guharanira ko ibyabaye bitazongera ukundi turasaba urubyiruko kujya mutinyuka mukabwiza ukuri babandi bose bashaka kugoreka amateka yacu, yashimangiye ko abanyarwanda dukwiye kurangwa n’ubumwe bwacu tukirinda ikintu cyose gishobora kuzana amacakubiri yasoje asaba ababyeyi gukomeza kwigisha urubyiruko amateka y’igihugu cyacu no kurwanya ihakana n’ipfobya bya Jenoside.”

Umunyamabanga Wa Leta muri Minisiteri y'Uburezi Madamu IRERE Claudette atanga ubutumwa nyuma y'umuganda rusange.

Amafoto yaranze ibikorwa by'Umuganda usoza ukwezi kwa werurwe 2025

Hon.senateri UWIMBABAZI Penina yatanze ubutumwa nyuma y'umuganda rusange asaba ababyeyi kwigisha abana kugira umuco wa gukunda igihugu no kwirinda ingengabitekerezo ya Jenoside.

Ku rwibutso rwa Jenoside rwa Kibungo ahakorewe umuganda rusange usoza ukwezi kwa Werurwe 2025 haruhukiye imibiri y’abatutsi bazize Jenoside yakorewe abatusti mu 1994 isaga 25,000.

Abayobozi batandukanye bitabiriye umuganda rusange usoza ukwezi kwa werurwe 2025

Umunyambanga Nshingwabikorwa w'Akarere INGABIRE Benoit nawe yari yitabiriye Umuganda rusange.

Bamwe mu bagize Inama Njyanama y'Akarere ka Ngoma nabo bari mu bitabiriye Umuganda rusange.

Abayobozi batandukanye babanje gusiga irangi ku byuma by'uruzitiro rwo ku rwibutso rwa Jenoside rwa Kibungo mu rwego rwo kubirinda umugese ushobora ku byangiza.