Kuri uyu wa Gatatu taliki 28/05/2025, Umuyobozi w’Akarere ka Ngoma yakiriye itsinda ry’Abadepite bari mu rugendo rw’akazi rw’iminsi 6 muri aka karere, rigamije kuganira n’abaturage no gusuzuma imitangire ya serivisi zitandukanye. Iri tsinda riyobowe na Hon. UWAMARIYA Veneranda, umwe mu badepite bagize Inteko Ishinga Amategeko y’u Rwanda.

Mu kiganiro cyabereye ku cyicaro cy’Akarere, abadepite bagaragarijwe ishusho y’ibibazo byagiye byakirwa n’Akarere mu bihe bitandukanye n’uko byagiye bikemurwa, hanagaragazwa zimwe mu ngamba zafashwe mu kubaka ubushobozi bw’abaturage no guteza imbere imiyoborere myiza. 

Mu minsi itandatu bazamara mu Karere ka Ngoma, abadepite bazasura imirenge itandukanye baganire n’abaturage ku mitangire ya serivisi z’ikoranabuhanga zirimo irembo, serivisi z’ubutaka, gahunda y’ubumwe n’ubudaheranwa bw’Abanyarwanda, banabakangurire kwirinda no gukumira amakimbirane. 

Mu biganiro biteganyijwe mu mirenge, abaturage bazagira umwanya wo gutanga ibitekerezo byabo ku bibazo bahura na byo, banasangize abadepite ku ntambwe bamaze gutera mu bumwe n’ubwiyunge nyuma ya jenoside yakorewe Abatutsi mu 1994.

Umuyobozi w’Akarere, yashimye uru ruzinduko avuga ko ari umwanya mwiza wo guhuza abaturage n’inzego zifatirwamo ibyemezo, anasaba abaturage kugira uruhare rufatika mu biganiro bizabahuza n’abadepite.