Muri iki gitondo taliki 05 Gicurasi 2025 ku cyicaro cy’Akarere, Umuyobozi w’Akarere wungirije uhsinzwe imibereho myiza y’abaturage Madamu MUKAYIRANGA Marie Gloriose yakiriye ku mugaragaro abarimu bashya bagiye gutangira inshingano zabo mu bigo by’amashuri bitandukanye. Yabifurije ikaze mu rugendo rw’iterambere ry’uburezi batangiye, abasaba kurangwa n’indangagaciro zirimo ubupfura, ubunyamwuga n’ubwitange.

Mu ijambo rye, Umuyobozi w’Akarere wungirije ushinzwe imibereho myiza y’abaturage Madamu MUKAYIRANGA Marie Gloriose yavuze ati: “Muri ababyeyi b’igihugu, muri abarezi b’umutima. Tugomba gusigasira ireme ry’uburezi binyuze mu gukunda akazi no gukunda abana twigisha. Uburezi ni umurimo usaba ubwitange, ntushobora kuwukora utabukunze.”

Yakomeje abasaba kuba indorerwamo nziza ku banyeshuri, bagaharanira kuba icyitegererezo mu myitwarire yabo. Yashimangiye ko uburezi ari ishingiro ry’impinduka z’ubumenyi, umuco n’ubuyobozi bwiza, asaba abarimu bashya kujya bagira umuco wo kuganira n’abanyeshuri, kubatega amatwi no kubafasha guhanga udushya.

Madamu MUKAYIRANGA Marie Gloriose yijeje abarimu bashya batangiye akazi ubufatanye mu kubafasha gusohoza neza inshingano zabo, abasaba guhora baharanira guhindura ubuzima bw’abanyeshuri babo.

Umuyobozi w'Akarere wungirije ushinzwe imibereho myiza y'abaturage Madamu MUKAYIRANGA Marie Gloriose yasabye abarimu gukora akazi kabo kinyamwuga.

Abarimu bashya batangiye inshingano basobanuriwe imyitwarire mbonezamurimo ikwiye kuranga umukozi wa Leta.

Abarimu bagiye kwigisha mu bigo bitandukanye mu Karere ka Ngoma.