Mu gikorwa cyo kwibuka ku nshuro ya 31 Jenoside yakorewe Abatutsi mu 1994, cyabereye mu Murenge wa Rurenge kuri E P Kigarama hibukwa abarimu 18 n’abanyeshuri 111 bishwe mu Jenoside yakorewe batutsi mu 1994 bo mu bigo by’amashuri bitandukanye byo muri uyu Murenge, Umuyobozi w’Akarere wungirije ushinzwe imibereho myiza y’abaturage Madamu MUKAYIRANGA Marie Gloriose yasabye abarimu n’abanyeshuri kurwanya amacakubiri no kwamagana ingengabitekerezo ya Jenoside bagaharanira kwimakaza gahunda ya Ndi Umunyarwanda.

Mu ijambo rye, yashimangiye ko ishuri ari umusingi w’uburere bubereye igihugu, asaba abarezi n’abanyeshuri kurangwa n’urukundo, ubupfura, n’indangagaciro zubaka amahoro arambye. Yagize ati:

“Turibuka abana n’abarezi bishwe bazira uko bavutse. Dukwiye guharanirako ibyabaye bitazongera ukundi binyuze mu kwanga urwango, amacakubiri n’ivangura iryo ari ryo ryose. Umurezi w’ukuri yigisha amahoro, agatoza ukuri, kandi akabera umunyeshuri icyitegererezo mu rukundo n’ubumuntu.”

Yibukije abanyeshuri ko ejo hazaza h’Igihugu cyacu hari mu biganza byabo, abasaba kwiga bashyizeho umwete, gukunda igihugu, no guharanira kuba abayobozi beza b’ahazaza hatarangwa n’irondabwoko n’urugomo.

“Kwibuka ni ukuzirikana amateka mabi yaranze igihugu cyacu, ariko kandi ni no guhitamo icyerekezo gishingiye ku bumwe. Mwe rubyiruko, mujye mwibuka mushyira imbere kwiyubaka, gukundana no kurwanya icyahungabanya amahoro dufite.” 

Yashimangiye ko Leta izakomeza gufasha abarokotse Jenoside ndetse no guteza imbere ireme ry’uburezi rishingiye ku ndangagaciro z’ubumuntu, uburere n’ubutwari. Yasoje asaba abarimu kugira uruhare rugaragara mu kubaka icyizere mu banyeshuri no kubatoza gahunda ya Ndi Umunyarwanda.

Mu cyahoze ari komini Kaberangwe yahindutse Umurenge wa Rurenge abatutsi bazize jenoside yakorewe abatutsi mu 1994 bamaze kumunyekana ni 129 barimo abarimu 18 n’abanyeshuri 111.

Umuyobozi w'Akarere wungirije ushinzwe imibereho myiza MUKAYIRANGA Marie Gloriose yunamiye abarimu n'abanyeshuri bazize Jenoside yakorewe abatutsi mu 1994.

Abayobozi b'ibigo by'amashuri mu Murenge wa Rurenge bunamiye abarimu n'abarezi bazize jenoside yakorewe abatatsi mu 1994.

Abayobozi b'ibigo by'amashuri hamwe n'abarimu bitabiriye igikorwa cyo kwibuka ku nshuro ya 31 Jenoside yakorewe abatutsi 1994

Umuyobozi w'Akarere wungirije ushinzwe imibereho myiza Madamu MUKAYIRANGA MArie Gloriose yasabye abarimu n'abanyeshuri kwimakaza icyiza bakanga ikibi.