Kuri uyu wa Gatatu, tariki ya 13 Kanama 2025, mu Murenge wa Mutenderi, habereye ibirori byo kwizihiza Umunsi Mpuzamahanga Nyafurika w’Urubyiruko ku nsanganyamatsiko igira iti: “Kubaka ubushobozi bw’urubyiruko hagamijwe iterambere rirambye.”

Ibi birori byateguwe ku bufatanye n’Akarere ka Ngoma n’inzego zitandukanye z’urubyiruko, byitabirwa n’Umuyobozi w’Akarere ka Ngoma, Madamu Nathalie NIYONAGIRA, abahagarariye inzego z’umutekano, abayobozi b’inzego z’ibanze ndetse n’urubyiruko ruturutse mu tugari twose tugize Umurenge wa Mutenderi.

Mu butumwa yagejeje ku rubyiruko, Meya Nathalie NIYONAGIRA yashimangiye ko urubyiruko ari imbaraga z’igihugu kandi rufite uruhare rukomeye mu gufasha igihugu kugera ku ntego z’iterambere rirambye. Yagize ati:

“Kubaka ejo hazaza heza bisaba gushora imbaraga mu rubyiruko, kuko arirwo rufite ingufu, ubwitange n’ubuhanga bushobora guhindura ubuzima bw’abaturage. Turasabwa gufatanya kurushaho kurutoza indangagaciro, guhuza urubyiruko n’amahirwe ashobora kubafasha kwiteza imbere, kwihangira imirimo no kurufasha guhanga udushya mu byo mukora byose.”

Yakomeje asaba urubyiruko kurangwa n’ubunyangamugayo, gukunda igihugu, no kudatezuka ku nzozi zarwo, ahubwo rugaharanira kuzishyira mu bikorwa binyuze mu gukora cyane no gukoresha neza amahirwe igihugu kibaha.

Abahagarariye urubyiruko batanze ubuhamya bwerekana uko gahunda zitandukanye z’Akarere nka Kora Wigire na Kwihangira Imirimo ku Bafite Imishinga zabafashije kubona amahugurwa no kubona ubushobozi bwo gutangira imishinga iciriritse. Umunsi Mpuzamahanga Nyafurika w’Urubyiruko wizihizwa buri mwaka ku wa 13 Kanama, ugamije gukangurira ibihugu bya Afurika gushora imbaraga mu rubyiruko nk’urufunguzo rw’iterambere n’imiyoborere myiza.