Kuri uyu wa kabiri tariki ya 09/04/2019, mu Karere ka Ngoma habereye umuhango wo Kwibuka ku nshuro ya 25, abacuruzi bazize Jenoside yakorewe Abatutsi mu 1994. Uyu muhango wateguwe n’Urugaga rw’Abikorera(PSF), bo mu Karere ka Ngoma, rufatanyije n’Urugaga rw’Abikorera ku rwego rw'Intara witabiriwe na Guverineri w'Intara y'Iburasirazuba Bwana MUFULUKYE Fred, wari kumwe n'Uwungirije umuyobozi wa Polisi mu Ntara, SSP MUHETO Francis, uhagarariye PSF ku rwego rw'Igihugu Bwana MUTAGOMA Félix ndetse na Perezida PSF/Ku Ntara Bwana NDUNGUTSE Jean Bosco, Abayobozi ndetse n'amatsinda ya za PSF mu Turere twose tugize Intara y'Iburasirazuba, ukoari 7, n'Abayobozi bahagarariye utwo Turere. 

Aba bashyitsi bose bakiriwe n'Umuyobozi w'Akarere ka Ngoma, Bwana NAMBAJE Aphrodise, ba Visi Meya bombi RWIRIRIZA JMVianney na KIRENGA Providence,Abashinzwe inzego z’umutekano mu Karere, Abajyanama b'Akarere, Abikorera, Abihayimana, Abakozi b'Akarere n'Ab'Umurenge.

Umuhango wo kwibuka wabimburiwe n'urugendo rwo kwibuka, ruva ku Biro by’Akarere(Muri Pariking ya Hoteli ya Ngoma) kugera ku  Rwibutso rwa Kibungo, aho mu nzira hatangwaga ibisobanuro by'ahantu hanyuranye hagiye hicirwa Abatutsi, aha ni nko kuri “Economat” aho Abatutsi bahungiye, bizeye ko kubera ari mu Bihayimana ntacyo baba ariko, nyamara barahicirwa, imbere y’Ikigo cya Gisirkare aho Abasirikare barimbuye abatutsiaho kubarinda. Urugendo rwashorejwe ku Rwibutso rwa Kibungo, aho Guverineri n'abo bari kumwe basuye barusuye, bunamira abashyinguyemo ndetse bashyira n’indabo ku mva. 

Yaba umutangabuhamya HAKIZAMUNGU Elias, yaba Visi Perezida wa IBUKA mu Karere ka Ngoma, BISERUKA Omar, bombi bagarutse ku ivanguramoko n'ingengabitekerezo ya Jenoside byabibwe mu bantu n'ubutegetsi bubi, bikabayara Jenoside; ariko bashima Ingabo zari iza RPF-Inkotanyi, zahagaritse Jenoside; bashima Leta yatanze ihumure ikaba imaze kubaka umunyarwanda n'ubunyarwanda.

Mu ijambo rye Meya NAMBAJE Aphrodise yanenze kandi yamagana abacuruzi babaye ba ruharwa muri Jenoside mu Karere ka Ngoma, abo nka NZABONIMANA Callixte na HABIMANA Emmanuel bita Cyasa. Yihanganishije kandi akomeza abarokotse Jenoside, avugako kwibuka bigamije kumenya ibibi byabaye, kubyamagana no gufata ingambo ko bitazongera ukundi. Yashimiye PSF/Ngoma ku ruhare igira mu bikorwa binyuranye byo kwibuka. 

Perezida w’urugaga rw’Abikorera ku rwego rw’Intara, Bwana NDUNGUTSE Jean Bosco, yaragaragaje ko bitabdukanyije n’imyitwarire mibi y’abacuruzi bo muri Leta zabibye ingengabitekerezo ya jenoside, kuko ahenshi muri abo bacuruzi barimbuye bagenzi babo. Yashimangiye bo ahubwo bo bafatanyije, bafite igihango cyo gucana no gusigasira urumuri rw’icyizere.

Umushyitsi Mukuru, Guverineri MUFULUKYE Fred yavuze ko ari ngombwa kwibuka ariko tukibuka twishimira politiki nziza y'Igihugu cyacu ishingiye ku bumwe n'ubwiyunge bw'Abanyarwanda. Yasabye abaturage gusigasira ibyagezweho no kurwanya abagifite ingengabitekerezo ya jenoside. Yavuze ko Jenoside yakozwe n'Abanyarwanda ariko na none ihagarikwa n'Abanyarwanda, amahanga yaradutereranye ahubwo arebera. Yashimye cyane ko Jenoside yahagaritswe n’Ingabo zari iza RPF/Inkotanyi ziyibowe na Perezida wa Repubulika Paul KAGAME. Yashimiye abikorera mu bikorwa byo kwibuka no kwita ku barokotse Jenoside. Yashoje agira ati " Rubyiruko ni mwebwe muzaba Abacuruzi, Abayobozi, Ingabo z'ejo hazaza; turabasaba kutirara, kutibagirwa amateka Igihugu cyacu cyanyuzemo, kudatinya guhangana n'ibibazo kugira ngo u Rwanda rukomeze rutere imbere”.

Uyu muhango wo Kwibuka, abikorera washojwe no kuremera abarokotse Jenoside. Urugaga rw’Abikorera ku Rwego rw’Intara rwatanze inka 8 mu Ntara, 2 zihabwa abo muri Ngoma, izindi zikazahabwa abo mu tundi turere.

By SIBOMANA Jean Bosco
PRMCO/Ngoma